Himalay Aapko Himalay Jaisa Bana Deta Hai

"हिमालय आप को हिमालय जैसा बना देता है"

"Himalay brings out the Himalay in you."

Aur khud Himalay kaisa hai yeh na toh main bata sakta hoon, na bataye bina reh sakta hoon. Teen saal pehle, pehli baar Himalay gaya tha tab bhi main unn dino ke baare mein likhna chahta tha, par nahi likha. Iss baar gaya toh yeh expression mil gaya. Aur iss expression ke alawa, ya iss se better, main Himalay ke baare mein kuch bataon bhi toh kaise. Mujhe aise expressions mil jaate hain toh pata nahi jaise kya mil jaata hai.

Iss baar humari annual retreat par hum puri Innoraft ki team ke saath Himalay gaye the. Himalay sabse pehle yeh karta hai ke wahan pahunchte hi apne purre expanse ko aap ke andar uttar deta hai. Durr durr tak spread shaant majestic pahaad, unnpar chaanv aur dhup ki har pal badalti painting, romance jaisi halki halki si thandi hawa, impossible variety of flora-fuana ki khusboo, ussi khusboo mein mixed mitti ki aur pattharon ki khusboo, aur inn sab ke saath wo silence ka sound, sab mil kar sahi mein jaise aap ke andar uttar jaata hai. Makes your heart soar. Aise lagta hai ke aap expand ho gaye ho kisi tarah. Ek ho gaye ho aap har ek cheez se. Chitt shaant ho jaata hai aapka. Saari agitation gayab ho jati hai. Aur ek hosla sa bhar jaata hai aapne andar. Aur ek smile bhi bhar jaati hain andar.

Himalay ke alawa aisa sirf sundar ladkiyon ko gale lagane par hua hai mujhe.

Khair..

Hum sab Mt Happy mein ruke the. Ankit Jain ne iss cottage ko bohot hi achche se aur bohot hi achchi jagah banaya hai. Sabko wahan ek baar zaroor jaana chahiye. Mt Happy ke paas nadi hai. Gaon ke log usse `chakki nala` bulate hain. Pehle din Himalay pahunchte hi main Mt Happy cottage mein hi nahah liya tha aur saaf suthare kapde pehen liye. Iss liye baad mein jab chakki nala dekne gaye toh main kapade gile hone ke darr se nahaya nahi, sirf paani mein chhap chhap kar ke reh gaya. Agale din chakki nale jab gaye toh pehle paani mein sirf paer doboye. Barfila thanda paani tha. Baap re baap. Nahane ki himmat hi nahi hui. Lekin phir kaafi der baad hum saare idhar udhar baith kar ek dusre par paani girane lage. Dekhte hi dekhte hum sab ke andar ka bachcha aur bandar bade naturally bahar aa gaya. Sabko maza aane laga aur sab visibly nayi harkatein sikhne lage. Chikne pathar par paer phisalte hi balance kar lena. Cubhte pathar par dheere se paer rakhna. Agala kadam nadi mein kahan rakha jaaye. samajh jaana. Tez ya gehare paani mein kitni durr jaayein. Sab apne aap hone laga.

Nadi ke dusri taraf ek achcha spot dikha. Socha wahan ja kar baith jaon par beech mein dhaar bohot tez thi. Recently news mein kai saare river accidents bhi dekh rakhe the. Par phir ek badi bhaari lakhdi li support ke liye aur uss ke sahare nadi paar kar ke apne sweet spot tak pahunch gaya. Yeh sab karne ki thrill hamesha saath rahegi. Aur behte paani ke force ke liye ek respect bhi hamesha rahega. Rahe toh hi achcha hai.

Nahana hamesha achcha lagta hai mujhe. Par Himalay ke jharnon mein uss din nahah kar saare dard aur darr gaayab ho gaye.

Dusre din mera mann kiya ke kahin se bike arrange ki jaaye. Dost cum host Ankit ki bike nahi lena chahta tha kyon ke pata tha wo apni itni azeez bike unn pahadon par mujhe nahi dega. Phir pawan bhaiya ke bike rental dukaan par gaya. Unhone ek brand new Royal Enfield 350 ki chaabi di aur bola test ride kar lo. Andar se main turant darr gaya. Itni bhaari bike main pahadon pe chala paaonga ke nahi. Issi darr mein pawan bhaiya se pehle puchcha pada ke bike mein gear aage padte hain ya peeche. Phir bike neutral pe nahi aayi mujhse toh unhone kar ke di. Khoob jyaada hi dara hua tha main. Lekin phir maine bike chalani shuru ki aur ruka hi nahi. Royal Enfield ki sabse badi khasiyat hai ke wo jaise aapka hissa ban gati hai. Aur apni takat ko aap mein sama deti hai. Man aur machine ek ho jaate hain. Aur kahin bhi raasta bann jaata hai.

Ussi din shaam ko Gaurav ko bike pe bitta ke janafalls le gaya. Super elevation wali serpentine roads, gigantic pine ke paed, thandi hawa, aur har mod pe badlte view ko paar karte hue lag raha tha ke life ke har ek challenge ko paar karte chala ja raha hoon. Raat ko neeche uttar te samay bike ki engine band kar di aur downhill bas chale diya ussko. Neeche roll karti hui bike ka wajan aur momentum feel ho raha tha. Rat ke sannate aur andhere se darr laga shuru mein, aur phir shaandaar lagne laga. Agle din sab ne Rohtang jaane ka mann banaya aur ek van book ki. Maine kaha ke main toh bike pe jaaonga. Puri subeh ek alag hi confidence ke saath taiyaar hua. Jutte ke laces bhi ek dum tight se josh mein baandhe. Iss baar Sinha pillion rider bana mere saath. Neeche Naggar se upar Rohtang tak topography kitni hi baar change hui. Inn sab ke beench bike pe thud thud thud karte impossible si road par chalte rehna zindagi se aage band kar haath milane jaisa laga. Yeh ride meri ab tak ki sabse shaandar ride ban gayi. Kaafi unchai par pahunch gaye the tab ek badi ajeeb cheez hui. Jab bhi koi curve paar karte toh ek taraf gehri khai hoti aur ek taraf pathrili unchi Himalay ki chattane, aur strong sun. Teeno ke wahah se bhyankar vertigo hone laga aur aakhein chondhiyaane lagi. Kai baar chhakkar aaye aur laga khai mein girne wala hoon. Ab toh purest form of darr lagne laga tha. Bada dramatick sound karega, par aisa dikhne laga, lagne laga nahi, dikhne laga, ke jaise death aur life ek saath chal rahin hai, aur clearly death ka har cheez mein upper hand hai, bus usske marzi ki baath hai. Main aisi ekagrata se bike chalane laga jo sirf death ke saamne hone par hi aa sakti hai. Bike ka har ek purza, tyre ke neeche sadak ki constitution, hawa mein thand, peeche Sinha ki presence, sab cheezein ki awareness 2000% amlify ho gayi. Aur issi ekagrata ne help kiya. Pata nahi kab aisa hua, par sara darr uss confidence mein convert ho gaya jo death ke saath chalte chalte hi aa sakti hai. Phir kya tha. Himalay ne phir se ek baar mujhe himalay jaisa bana diya.

Bohot saare kisse aur likhna chahta hoon par main likhta bada deehre hoon. Phir kabhi.

Forever

"Ishq. Imaandaari. Inquilaab. Aur purre nabbe saal."

This is first time I am writing down from among my words to live by. And just as I do, I realize, these are not words to live by as much as they are words I have lived by. Haha. Guess the good things that you innately are do not change :-)

But why are you feeling today that some of the good things you are must change? And where is this confidence stemming from that this time you might? May be it's a start.

A note to the future self as you start then - Yaad karo uss din kisi ko dukh diya tha kya tumne? Yaad karo shyaad thoda diya ho? Yaad aaya? Haan. Tumhare khud ke khayal main apni achchayion se nikaal ke dukh diya? Ya buraiyon se? Abhi bhi waise hi ho?

Ah. I wish to be free flowing and forgiving as words on the paper today.

Sundar Ladki

Courtesy: Unknown Rumi's admirer on the internet

"Ladkiyaan sirf do tarah ki hoti hain. Sundar. Aur bohot sudar."

Meri dost falak ne ek baar JNU mein apni ek dost se milwaya tha. Wo badi fiery women rights activist thi. Aur bohot hi Sundar. Ussne hamare milne ke kuch dino baad mujhe apne birthday party mein bulaya tha. Maine kaha zaroor aaonga, aur tum apni saari sundar saheliyon ko bhi zaroor bulana. Uss ne mazak ki baat pe chot le li. Mujhe usse bhi batana pada tha ke mera lehja zara natkhat sa hota hai jab bhi sundar ladki ka zikr karta hoon toh. Par meri samajh mein ladkiyaan hoti hi sirf do tarah ki hain. Sundar. Aur bohot sundar.

Aakarshak aur sundar hona ek nahi hota. Aakarshakta sundarta ki jhalak dikhane wali ek khidki hai. Lakhon khidkiyaan aur bhi hain. Unnke khichaanv aur gherai ko lekin billboards par nahi utara ja sakta.

• Ladkiyaan akele mein aadmi se jyaada sehmi hui hoti hai.
• Wo ussi akelepan mein kisi se bhi jyaada okay aur majboot bhi ho sakti hain.
• Wo kitna pyaar kar sakti hai yeh aap andaaza bhi nahi laga sakte.
• Aur agar chidd jaayein toh ek dum pure nafrat. Chidd ne par. Gussa hone par nahi.
• Wo hans jaaye toh aas paas sab khush sa lagne lagta hai.
• Aur ro jaayein toh aadmi chodiye, bachchon se jyaada pighala deti hain.
• Kaam mein aadmi se jyaada shramik.
• Dil lagane mein aadmi se jyaada nadaan.
• Aur dillaggi mein aadmi se jyaada schemeing.
• Wo darti toh shayaad sabse jyaada hai. Unnke darr ka kuwaan unending hota hai.
• Phir bhi aadmi ka bada se bada darr apni presence se durr kar deti hain. Aadmi jab unnke aakarshan jaisi silly cheez se bhi jab sharam wale darr mein hota hai, toh wo darr bhi wahi nikaalti hai.
• Wo aadmi ko intimacy sikhati hai.
• Aur kabhi bina mann intimate hona padh jaaye toh aadmi se jyaada behtar disguise bhi kar leti hai.
• Bin bole wo kya kya nahi bol sakti.
• Kabhi kabhi kuch nahi bol paane ki bhi bechaargi unki jyaada hoti hai.
• Main most baatein aadmiyon se comparison mein likh raha hun. Wahan toh wo hands down supreme of the sexes hai hi. Par wo aapas mein bhi subhan-allah hoti hain.
• Ladd jaayein ek dusre se toh fiery. 
• Aur saath dein ek dusre ka toh aisi resilient ya sacrificing team aap ne dekhi na ho.
• Wo sabse jyaada samjhdaar aur mature hoti hain. Lagbhag har samay.
• Aur phir kabhi aisi bachchiyon si buddhu.

Yeh "list" bohot lambi hai. Saath mein likhi jaane par toh shaayad 'too much' bhi lage. Par inhi sab ungeenat 'better in all ways', good bad and everything in between, ki bani hoti hain ladkiyaan. Mere andar se inn sab baaton ko represent karne wala word sift 'sundar' hi nikalta hai.

Aap puchchoge sundar toh samajh aa gaya. Ab bohot sundar kaun kaun hui? Isska answer toh main aur aap sab jaante hain. Par dhang se unhe bata kab paate hain. Haha.